Minst fem menneske døydde i forsøk på å krysse Den engelske kanalen
Minst fem menneske omkom då dei forliste medan dei prøvde å ta seg frå Frankrike til Storbritannia over Den engelske kanalen, opplyser fransk politi.
Eit barn skal vere blant dei omkomne. Ein talsperson for den franske kystvakta opplyser at det tysdag var travelt etter fleire forsøk på å krysse kanalen.
Ifølgje avisa La Voix du Nord var rundt 100 redda opp av vatna tysdag morgon. Tre helikopter og fleire redningsbåtar bidrog i redningsarbeidet.
Forsøka på å krysse kanalen skjedde etter at Parlamentet måndag vedtok forslaget frå den britiske regjeringa som opnar for å sende asylsøkjarar til Rwanda.
Rwanda-planen er ein politisk prioritet for statsminister Rishi Sunak, som ønskjer å stanse den store migrasjonstrafikken over kanalen. Den er møtt med skarp kritikk frå menneskerettsgrupper.
Den britiske innanriksministeren James Cleverly seier at regjeringa gjer alt ho kan for å stanse dei farlege overfartane. På X/Twitter skriv han at «desse tragediane må stanse».
– Eg vil ikkje akseptere ein status quo som kostar så mange liv, skriv Cleverly.
Titusenvis av migrantar – mange på flukt frå krig og fattigdom i Afrika, Midtausten og Asia – har teke seg til Storbritannia på tvers av kanalen dei siste åra.
(©NPK)