Minst tre omkom i togulykke i Belgia

(NPK-NTB-DPA-Ritzau): Minst tre personar er døde og ni er skadde etter at eit passasjertog køyrde inn i eit godstog utanfor den belgiske byen Liège søndag kveld.

npk@npk.no

Publisert: 06.06.2016 kl 07:20

Talet på omkomne etter den kraftige togkrasjen kan komme til å stige, seier ordførar Francis Dejon i Saint-Georges-sur-Meuse til nyheitsbyrået Belga.

Om lag 40 personar var i passasjertoget, ifølgje DPA, som skriv at godstoget heldt ein fart på 90 kilometer i timen då det vart påkøyrt bakfrå.

Jernbaneoperatøren Infrabel bekreftar at dei to toga var på same spor då det gjekk gale søndag kveld. Passasjertoget køyrde inn i godstoget bakfrå. Ulykka skjedde like ved byen Hermalle-sous-Huy, som ligg omtrent 20 kilometer vest for Liège.

Årsaka til ulykka er ikkje fastslått, men ein talsmann for Infrabel bekreftar at eit lynnedslag tidlegare søndag førte til skadar som kravde reparasjon på strekninga. Avisa L'Avenir skriv at reparasjonsarbeidet på den aktuelle strekningen førte til at togtrafikken gjekk på eitt spor, men dette er ikkje offisielt bekrefta.

Vitne fortel til L'Avenir at dei to fremste vognene i toget vart øydelagde i ulykka. Belga beskriv krasjen som svært kraftig og skriv at politi og brannvesen frå Liège måtte kallast ut til ulykkesstaden. Fleire passasjerar måtte skjærast laus frå dei øydelagde vognene. (©NPK)