Mot ja til skiflyging for kvinner – stornasjonar har snudd

Dermed går det mot at Maren Lundby og resten av verdseliten i kvinnehopp kan innkassere ein siger som det frå norsk side har vore kjempa hardt for i mange år.

Onsdag møtest hoppverdscupkomiteen til kalendermøte. Der er landslagssjef Clas Brede Bråthen Noregs representant. På det tilsvarande møtet for eitt år sidan vart det norske forslaget om skiflyging for kvinner med ein finale i Raw Air stemd ned.

Ni av dei seksten stemmeføre vende då tommelen ned. Blant dei var store hoppnasjonar som Austerrike, Tyskland, Slovenia og Japan. Det kom overraskande på mange.

No tyder mykje på at avrøystinga onsdag vil få eit anna utfall.

– No har hopp igjen jobba godt inn mot dette møtet, og eg har gjennom helga hatt samtalar med tre av kollegaene mine, skipresidentane i Austerrike, Slovenia og Tyskland. Både Austerrike og Tyskland har overfor meg stadfesta at dei vil støtte forslaget vårt, seier skipresident Erik Røste til NTB.

Stadfesting måndag

Den siste stadfestinga frå austerriksk hald kom så seint som måndag.

– Eg vart veldig glad då den siste tekstmeldinga tikka inn i formiddag frå den nyvalde skipresidenten der nede om at dei støttar Noregs forslag, seier Røste.

– Betyr det at du no kjenner deg veldig trygg på at det kjem eit ja til skiflyging for kvinner onsdag?

– Ein kan aldri kjenne seg heilt trygg, men no er eg veldig optimist med tanke på at kvinnene endeleg skal få lov til å flyge. Det har vi frå norsk side jobba aktivt for i fleire år. Vi meiner det er langt på overtid, seier Røste og kallar eit eventuelt ja onsdag for ein viktig siger.

Dersom planane no blir ein realitet, vil det mest sannsynleg bli lagt opp til eit skiflygingsrenn i Vikersund med eit nokre få utøvarar. Resten av detaljane står att å få på plass.

Maren Lundby har vore blant dei fremste forkjemparane for at kvinnehopparane skal få sleppe til i skiflygingsbakkane.

– Om det skal stemmast over endå ein gong, blir eg veldig overraska om nasjonar som Austerrike, Slovenia, Japan og Tyskland stemmer mot igjen. Dei har dei beste hopparane i verda, og om dei stemmer imot, då heng ikkje systemet saman. Då snakkar ikkje utøvarar og leiarar same språket, og det er berre tragisk, sa ho til NTB for ei tid tilbake.

Arbeidsgruppe med tilrådingar

Skipresident Røste har den siste tida leidd ei arbeidsgruppe som har sett på framtida for den nordiske skisporten. Gruppa leverte den endelege rapporten sin i slutten av mars. Ei av tilrådingane der handlar om nettopp den vidare utviklinga av hopp for kvinner.

Arbeidsgruppa har ved det høvet lagt fram tre konkrete forslag.

– Det eine er skiflyging. Det andre er at nasjonar som arrangerer herrehopprenn, også må forplikte seg til å arrangere kvinnehopprenn. Det trur vi kan gjere terminlista og produktet kvinnehopp endå betre, seier Røste.

– Det tredje er at det må innførast ei turnering også i Mellom-Europa, sånn som vi har i Raw Air, legg han til.

Forslaga skal opp til diskusjon i tida som kjem.

(©NPK)

Maren Lundby på sletta i Vikersundbakken under VM i skiflyging. Foto: Geir Olsen / NTB