Myrhol spelar mot Polen

(NPK-NTB): Bjarte Myrhol har fått klarsignal for å spele EM-kampen mot Polen laurdag. Strekspelaren bekreftar at han ønsker å spele ein rolle mot vertsnasjonen.

– Bjarte er medisinsk klarert til å spele. Eg har gitt beskjed om at han kan spele, så blir det opp til Bjarte sjølv å vurdere, seier landslagslege Thomas Torgalsen.

– Eg spelar, bekreftar Myrhol overfor NTB.

– Det er både morosamt og slitsamt å følgje kampane frå sida, men no gler eg meg veldig til kampen, fortset han.

Myrhol var med for fullt på treninga torsdag, men det er ein risiko for at kuttet kan sprekke opp. Kapteinen fekk eit kutt på venstre hand under kampen mot Island fredag. Ei hudflerre mellom to fingrar gav eit ope sår inn til beinet

– Eg kjenner risikoen, men skal teipe fingeren godt, seier Myrhol. (©NPK)