Næringsdepartementet legg bort saka mot Norwegian

– Etter samtaler med den juridiske rådgivaren vår legg vi no saka bort, då vi reknar at staten ikkje har meir å hente økonomisk på å ta vidare initiativ overfor Norwegian, skriv statssekretær Halvard Ingebrigtsen (Ap) til Dagens Næringsliv.

Næringsminister Vestre har tidlegare insistert på at flyselskapet Norwegian måtte betale tilbake bonusane som det førre styret hadde delt ut til den tidlegare leiarduoen Jacob Schram og Geir Karlsen. Toppane fekk utbetalt 11 millionar kvar i bonus i mai 2021.

Det skjedde medan selskapet var avhengig av skattefinansiert milliardstøtte for å halde seg på vengene under pandemien, skriv avisa.

I etterkant hyra departementet ein partnar i Advokatfirmaet Wiersholm, og det vart laga ei juridisk vurdering som konkluderte med at bonusane til Schram og Karlsen var ulovlege. Norwegian tilbakeviste at bonusane var ulovlege.

Sjølv om departementet har lagt bort saka, meiner statssekretær Ingebrigtsen at kritikken har vore på sin plass.

– Vi har teke opp saka med Norwegian ei rekkje gonger, både i brev og i møte. Styret i Norwegian har erkjent at delar av bonusutbetalingane ikkje samsvarte med avtalen vår, og reverserte bonusen utbetalt til Geir Karlsen i 2020. Dei har også beklaga og skjerpa rutinane sine, seier han.

(©NPK)

Næringsdepartementet legg bort saka mot Norwegian.
Foto: Javad Parsa / NTB / NPK