«Nazi-bestemor» dømd for opprørsk åtferd i Tyskland

(NPK-NTB-DPA): Ein 87 år gammal notorisk holocaust-fornektar er dømd til åtte månaders fengsel for opprørsk åtferd. Kvinna som tyske media omtalar som «nazi-bestemor», hevda at Auschwitz aldri blei brukt til å masseutrydda jødar.

npk@npk.no

Publisert: 02.09.2016 kl 12:16

Sist oppdatert: 02.09.2016 kl 14:56

87 år gamle Ursula Haverbeck møtte fredag i retten Detmold i Nordrhein-Westfalen. Ho var tiltalt for å ha skrive eit brev til ordføraren i byen der ho hevdar at det er svært opplagt at Auschwitz ikkje var noko anna enn ein arbeidsleir.

Alle personar offentleg omfamnar, fornektar eller tonar ned omfanget av masseutryddinga av jødane, risikerer opptil fem års fengselsstraff i Tyskland.

Ho sende brevet til ordføraren i Detmold i februar då ei tidlegare Auschwitz-vakt stod for retten. Haverbeck blei fredag dømd til åtte månaders fengsel for påstanden i brevet. Ho varsla like etter at ho kjem til å fremja ny anke.

I fjor sa ho at «holocaust er den største og lengstlevande løgna i historia» i eit fjernsynsintervju utanfor ein rettsbygning i Lüneburg, der ei anna Auschwitz-vakt stod for retten, og ho blei dømd til ti månaders fengsel. Ho anka dommen, som ikkje er sett ut i livet.

Om lag 1 million jødar og 100.000 andre menneske blei drepne i Auschwitz-Birkenau i det okkuperte Polen under andre verdskrigen. Til saman 6 millionar jødar blei drepne av nazistane under krigen. (©NPK)