NBA vil markere støtte til Black Lives Matter-rørsla

For å unngå å ta vekk fokuset frå kampen mot rasisme planlegg den nordamerikanske basketligaen NBA å skrive «Black lives matter» på banane.

oddvar.sagbakken.saanum@ntb.no/hakon.remoy@npk.no

Publisert: 30.06.2020 kl 08:56

Det opplyser kjelder til Disney-eigde ESPN.

NBA-sesongen vart sett på pause som følgje av koronapandemien 11. mars, men planlegg å starte opp att 30. juli. Kampane skal spelast i tre ulike arenaer i eit Disney-eigd anlegg i Orlando.

Spelarar i ligaen har insistert på at kampen for likestilling og sosial rettferd skal vere ein sentral del når NBA startar opp igjen. Fleire spelarar har vurdert å droppe sesongavslutninga.

Leiaren av spelarorganisasjonen NBPA, Oklahoma City Thunders Chris Paul, har tidlegare opplyst at spelarane skal kunne skrive personlege bodskapar på drakta når sesongen startar opp att.

Også i kvinnenes WNBA blir det diskutert tilsvarande løysingar. Fleire spelarar i ligaen har allereie bestemt seg for å stå over den komande sesongen.

(©NPK)

Leiaren av spelarorganisasjonen Chris Paul har opplyst at spelarane skal kunne skrive personlege bodskapar på drakta når sesongen startar opp att. Foto: AP Photo / Nam Y. Huh /NTB scanpix