New York Rangers snudde og slo Zuccarellos Minnesota Wild

For med litt over åtte minutt att av oppgjeret såg Wild ut til å halde fram den gode forma og vinne sin andre på rad og femte av dei siste seks med ei solid 3–1-leiing. Ryan Donato, Jonas Brodin og Jordan Greenway hadde skåra måla for heimelaget.

Så reduserte Rangers-spelar Pavel Butsjnevitsj til 2–3 etter å nærast ha vorte treft av pucken rett føre mål etter 52 minutt.

Og laga var like langt minuttet før slutt. Mika Zibanejad styrte eit skot frå Artemi Panarin i mål til 3–3.

På straffeslag sette nettopp Zibanejad og Panarin sine to forsøk, medan både Zach Parise og Donato bomma for Wild. Dermed enda oppgjeret 4–3 til Rangers etter straffeslag.

– Vi har vore i desse situasjonane før der dette har skjedd. Vi må lære å vinne kampar som dette, for om vi er så heldige og klarer å kome oss til sluttspel, og tape som dette, er det veldig tøft. Vi må lære oss å fullføre kampar. Dette syg, sa Donato etter kampen.

– Vi treng 18 spelarar og ei målvakt til å spele bra. Og vi hadde ikkje 18 spelarar som spelte på sitt beste mot Rangers. Vi må ha med oss alle, sa trenar Bruce Boudreau.

Gamlelaget til Zuccarello har no vunne tre kampar på rad. Nordmannen fekk 17 minutt på isen torsdag, utan å vere delaktig i nokon av dei tre måla til Wild.

(©NPK)

Minnesota Wilds Jonas Brodin (t v) etter skåringa mot New York Rangers i første periode av kampen torsdag. Foto: Jim Mone / NTB scanpix