Nobelprisvinnar Mohammadi ber iranarar protestere mot «krigen mot kvinner»
Den fengsla fredsprisvinnaren Narges Mohammadi meiner Iran driv ein fullskala-krig mot kvinner. Ho ber det iranske folket protestere.
Iranske styresmakter har denne månaden sett i verk ein landsdekkjande operasjon for å sjå til at iranske kvinner går med tildekkjande plagg på hovudet.
Fleire aktivistar har rapportert om kvinner som har vorte arresterte og tekne med av det såkalla moralpolitiet til politistasjonen.
– Irans folk, eg ber dykk, artistar, intellektuelle, arbeidarar, lærarar og studentar, både i og utanfor landet, protestere mot denne krigen mot kvinner, seier Mohammadi i ei melding vidareformidla av tilhengarane hennar.
Fredsprisvinnaren frå i fjor sit fengsla i Evin-fengselet, dømd for propaganda mot staten.
(©NPK)
Vinnaren av Nobels fredspris i fjor, Narges Mohammadi, ber iranarar kjempe mot «krigen mot kvinner» ho meiner regimet i landet fører. Foto: Javad Parsa / NTB
Kiana og Ali Rahmani ved sida av ein tom stol med fredsprisdiplomet til den fengsla mor deira, Narges Mohammadi, i desember i fjor. Foto: Fredrik Varfjell / NTB