Noreg skal hjelpe Ukraina med å byggje kyst- og sjøforsvar

Storbritannia og Noreg skal saman med fleire andre land hjelpe Ukraina med å styrkje tryggleiken langs kysten og til havs. Det er Noreg og Storbritannia som skal leie den maritime koalisjonen, opplyser regjeringa i ei pressemelding natt til måndag.

I meldinga heiter det at Noreg mellom anna kan bidra med maritim kompetanse, nye teknologiske løysingar og nytenking.

– Vi må hjelpe Ukraina i arbeidet med å opne handelsruter og fri ferdsel i Svartehavet. Vi har mål om å styrkje Ukrainas sjøforsvar og forbetre Ukrainas evne til å operere langs eigen kyst, seier forsvarsminister Bjørn Arild Gram (Sp).

Han seier Noreg allereie har gjennomført opplæring av ukrainske soldatar i småbåtoperasjonar og kan byggje vidare på denne støtta når dei konkrete planane for vidare utvikling er ferdige.

– Målet er å vidareutvikle arbeidd som allierte og partnarar gjer for å støtte Ukraina, både på kort og lang sikt. No vil Storbritannia, Noreg og andre land hjelpe Ukraina med å byggje ein varig maritim kapasitet. Dette er eit langsiktig prosjekt, og støtta vil krevje mykje arbeid i mange år framover, seier Gram.

(©NPK)

Forsvarsminister Bjørn Arild Gram (Sp) opplyser at Noreg og Storbritannia skal leie ein maritim koalisjon som skal hjelpe Ukraina med å styrkje tryggleiken langs kysten og til havs.
Foto: Terje Pedersen / NTB / NPK