Normann uaktuell for neste landslagssamling: – Ein ekstraordinær situasjon

Klaveness opplyser i ei pressemelding at ho og landslagssjef Ståle Solbakken er samde om at midtbanespelaren ikkje er aktuell for landslagssamlinga som ventar.

«Landslagssjef Ståle Solbakken har i ettermiddag informert Mathias Normann at han ikkje er aktuell for neste landslagssamling ettersom han no har signert for ny russisk klubb. Solbakken informerte Normann i går om at dette kunne bli utfallet om han tok eit slikt val no», heiter det i uttalen.

Ifølgje russiske medium har Normann bestått den medisinske sjekken i Dinamo Moskva, men overgangen har ikkje vorte stadfesta av klubben enno. Ifølgje NFF er den klar.

Utelaten

Normann sa i eit intervju i helga at ein låneovergang til ein ny russisk klubb var like om hjørnet. Det har skapt reaksjonar i heimlandet, og no har leiinga i NFF teke valet om å utelate han frå troppen som skal spele nasjonsliga i slutten av september.

– Det er ganske enkelt. Per dags dato er det den beste sportslege moglegheita eg har. Då enda vi opp med det, sa Normann.

Normann har vore under kontrakt med russiske Rostov sidan januar 2019. Sist sesong var han i Norwich i Premier League. Der vart det nedrykk, og opphaldet i England vart ikkje forlengt.

– Ekstraordinært

Klaveness seier at valet om å utelate han er teke som følgje av at det er ein ekstraordinær situasjon.

– I utgangspunktet er det ikkje rolla til forbundet å meine noko om landslagsspelarars klubbval, men vi er no i ein ekstraordinær situasjon. Heile norsk og europeisk fotball er samde om å setje felles press på Russland som ein krigførande part, som også har brukt maktposisjonar i idretten svært aktivt. Alle russiske lag er utestengde frå internasjonale idrettskonkurransar. Ståle og eg er samde om at Normann ikkje kan representere Noreg når han no skal spele for ny russisk klubb, seier Klaveness.

(©NPK)

Mathias Normann vil ikkje bli tatt ut til den neste landslagssamlinga grunna valet om å signere for ein ny russisk klubb.
Foto: Lise Åserud / NTB