Norsk sykkeltalent klar for profflag

(NPK-NTB): Det norske profflaget Team Hitec har signert 17 år gamle Susanne Andersen. Sportsdirektør Karl Lima torde ikkje å vente lengre og tilbydde henne kontrakt.

npk@npk.no

Publisert: 22.10.2015 kl 17:50

Fleire utanlandske UCI-lag begynte å vise interesse for Stavanger-jenta. Då greidde ikkje Lima å ha is i magen og gav junioren kontrakt med sitt Hitec-lag, melder Pro Cycling.

– Det er første gong vi har signert nokon som er så unge. Ho held på trenaren sin og fortset i Stavanger SK, så det er ikkje slik at vi tek henne vekk frå eit miljø. Eg ønskte å sikre meg henne så tidleg som mogleg, men det er først og fremst for å gi henne sjansen på eit norsk lag i sin første sesong på seniornivå i 2017, sa Lima til nettstaden.

Andersen blei nummer fem på VM-fellesstarten i juniorklassen i september. Ho vann også NM-gull for juniorar og har etappesigrar frå EPZ Omloop van Borsele og U6 Cycle Tour.

– Ho har ei avslutning som gjer at ho kan vinne mange løp. Ho vil alltid vere farleg om ho sit igjen i ei gruppe. Då vil det dreie seg om podium eller vinnarsjansar, sa Lima. (©NPK)