Norske helsestyresmakter forpliktar seg til internasjonalt miljøkrav
I eit nytt samarbeid med Storbritannia og USA forpliktar norske helsestyresmakter seg til å følgje internasjonale miljøkrav for anskaffingar.
Det betyr mellom anna strengare krav til utslepp og materialbruk hos leverandørane i helsesektoren, skriv helseføretaket Sjukehusinnkjøp.
Samarbeidet er ei forlenging av Noregs tilslutning til helseprogrammet under klimakonferansen i Glasgow 2021. Eit femtitals land signerte denne avtalen, og i ettertid har helsestyresmaktene i Storbritannia (NHS) og USA forma ut eit vegkart for å nå måla i avtalen.
Det er dette vegkartet, «NHS Procurement Roadmap», norske helsestyresmakter no har forplikta seg til å følgje.
– Vi veit at det største potensialet for utsleppskutt ligg i verdikjeda, altså alt vi kjøper inn. Det er her 70 til 80 prosent av klimagassutsleppa skjer, seier spesialrådgivar Maiken Pollestad Sele i Sjukehusinnkjøp.
Derfor rettar satsinga seg i stor grad mot produksjons- og distribusjonsleddet før bestillingane kjem til sjukehusa. Eitt av måla er at alle leverandørar skal ha ein plan for heile produksjons- og fraktkjeda i tråd med NHS-måla om nullutslepp, innan april 2027.
Helsedirektoratet har også utarbeidd eit høyringsutkast til eit norsk vegkart mot ei berekraftig, lågutslepps helseteneste.
(©NPK)
Norske helsestyresmakter forpliktar seg til å følgje vegkartet til helsestyresmaktene i Storbritannia og USA mot et utsleppsfritt helsestell. Kartet rettar seg i stor grad mot anskaffingar. Illustrasjonsfoto: Terje Pedersen / NTB