Norske selskap sponsar Ukraina med dronar til bombing av russiske soldatar

– Vi har personar i det private næringslivet i Noreg som bidreg med pengar til arbeidet vårt, seier leiar Daniel Viksund i Veteran Aid Ukraine til NRK.

Organisasjonen består mellom anna av veteranar frå det norske Forsvaret, og har sidan den russiske invasjonen i februar i fjor levert dronar og anna materiell som er sponsa av næringslivet i Noreg. Dronane har ifølgje Veteran Aid Ukraine teke livet av mange russiske soldatar.

Viksund var nyleg i Ukraina og leverte utstyr til den ukrainske hæren til fleire millionar kroner. I ein bil disponert av organisasjonen hans var det også ei last med 15 dronar.

– Tre av dronane var svært avanserte og kostbare. Prislappen er på 250.000 kroner per stykk. Det utstyret vi har fått tak i, i Noreg og Skandinavia, er av svært høg kvalitet og utgjer ein stor forskjell i krigen, seier Viksund.

Eitt av dei norske firmaa som har gitt pengar er elektroentreprenørfirmaet AS Watt.

– Det er viktig at næringslivet også bidreg med dette når tidene er som dei er, seier administrasjonsleiar Andreas Kallhovd.

(©NPK)

Ukrainske soldatar sender opp ein drone ved Bakhmut i Donetsk i desember i fjor. Norske firma er blant dei som har donert dronar til den ukrainske hæren, men opphavet til dronen på bildet er ikkje kjent. Foto: LIBKOS / AP / NTB