NVE startar overvaking av nytt fjellparti
Det ustabile fjellpartiet Skutshorn i Vang kommune i Valdres blir klassifisert av NVE som eit høgrisikoobjekt, og no skal det overvakast døgnet rundt.
Eit større fjellskred frå Skutshorn kan forårsake ei flodbølgje som kan ramme busetnad langs Vangsmjøse og kommunesenteret i Vang. Deler av fjellpartiet på opp mot ti millionar kubikkmeter bevegar seg med opptil tre centimeter i året.
– Kartlegginga viser at faren og konsekvensane ved eit skred frå fjellpartiet blir vurdert som så store at vi ønskjer ei kontinuerleg overvaking, seier geolog Kjetil Indrevær i skredseksjonen i NVE.
Det betyr at NVE tek ansvaret for varsling til kommune, politi og statsforvaltaren ved auka rørsler i fjellpartiet. NVE ønskjer å ha på plass eit system for kontinuerleg overvaking så raskt som mogleg, innan utgangen av 2023.
Fram til då er det allereie no etablert overvaking som vil gi tidleg forvarsel om eventuelt auka rørsler i fjellpartiet.
Skutshorn er eit stort ustabilt fjellparti som ligg 600 meter over innsjøen Vangsmjøse. Noregs geologiske undersøking (NGU) har kartlagt fjellpartiet sidan 2018.
Skutshorn blir det tiande fjellpartiet i Noreg som blir overvaka døgnet rundt.
(©NPK)
NVE startar kontinuerleg overvaking av fjellpartiet Skutshorn i Vang kommune i Valdres. Markeringa viser kva del av fjellet som kan rase ut. Foto: Reginald Hermanns / NGU / NTB / NPK
NVE startar kontinuerleg overvaking av fjellpartiet Skutshorn i Vang kommune
Foto: Gustav Pless / NVE / NTB / NPK