Klargjør siden...

Ny innskjerping: Regjeringa vil ha 9.000 tvangsreturar i år

(NPK-NTB): Politiets utlendingseining (PU) har i eit ferskt tildelingsbrev til Politidirektoratet auka kravet til tvangsreturar med 1.200. Totalt er då målet for 2016 å transportera ut 9.000 personar.

I fjor sette PU ny rekord med uttransport av 7.825 personar – 25 fleire enn måltalet til regjeringa.

Verken då statsbudsjettet for 2016 blei lagt fram, eller då tilleggsnummeret til budsjettet blei presentert for å fanga opp ekstrautgifter på grunn av auken av asylsøkjarar, blei måltalet på 7.800 uttransporteringar auka, skriv Aftenposten.

Justisminister Anders Anundsen (Frp) har likevel no auka måltalet med 1.200 personar – utan at PU er lova meir pengar. Det går fram av det ferske tildelingsbrevet til Politidirektoratet.

I samband med statistikken til PU for 2015, varsla innvandringsminister Sylvi Listhaug (Frp) på ein pressekonferanse i januar, at talet kunne auka i kjølvatnet av det rekordhøge talet asylantar som kjem til landet.

PU-sjef Kristin Kvigne har tidlegare sagt at til NTB at PU har kapasitet til å nå måla for 2016, men at det er ei utfordring.

– Men det er klart at vi har ein stor portefølje med personar som skal transporterast ut, og det er også klart at talet vil auka vesentleg når innkomsten av asylantar er så høg. Utfordringane våre aukar i tida framover, sa ho i januar. Tidlegare har Kvigne også sagt at viss uttransporteringane skal aukast, må PU få meir ressursar.

I eit svar på e-post til Aftenposten skriv PU torsdag at «uttransport av 9.000 vil gi merutgifter for PU, og vi er i dialog med overordnede myndigheter om finansieringen av dette.» (©NPK)

Annonse