Ny måling gir raudgrønt fleirtal

(NPK-NTB): I ei ny meiningsmåling får dei raudgrøne partia fleirtal på Stortinget uansett om Arbeidarpartiet samarbeider med SV, MDG, Raudt og Sp eller om dei inngår samarbeid med Sp og KrF.

npk@npk.no

Publisert: 08.06.2016 kl 19:55

Uansett kva for ein av desse konstellasjonane Arbeidarpartiet skulle velje å inngå i, ville det utgjort eit fleirtal med 85 mandat på Stortinget dersom meiningsmålinga som Norstat har laga for NRK var eit valresultat.

– Det er veldig hyggeleg med fleirtal, men det er eit jamt løp. Eg trur det blir spennande fram til 2017, seier Trond Giske, nestleiar i Arbeidarpartiet.

Arbeidarpartiet får den største framgangen i målinga og får ei oppslutning på 34,5 prosent (+2,4). Høgre går samtidig mest tilbake og får 21,5 prosents oppslutning (-2,8).

– Dette er ei litt for dårleg måling for oss, men vi har hatt mange vanskelege saker i innspurten på Stortinget. Eg trur vi kjem sterkare tilbake, seier statsminister og Høgre-leiar Erna Solberg.

Ho innrømmer at saker som kommunesamanslåing, flypassasjeravgift og asylinnstramming kan vere årsak til nedgangen.

For dei andre partia er det mindre endringar. Frp får 16,6 prosent (+1,5), KrF 4,8 (-0,5), Venstre 4,2 (-1,1), MDG 2,8 (+0,3), Senterpartiet 7,1 (0,6), SV 4,2 (-0,9) og Raudt 1,8 (-0,6).