Nyheitsbyrå: Russland set fri ukrainsk pilot

(NPK-NTB-TT): Den drapsdømte ukrainske Nadija Savtsjenko er lauslaten og på veg til Kiev. Ho skal bytast mot to russiske soldatar som er fengsla i Ukraina, ifølgje nyheitsbyrået Interfax.

npk@npk.no

Publisert: 25.05.2016 kl 12:45

Fangeutvekslinga skal visstnok skje på flyplassen i Rostov. Ukrainas president Petro Porosjenko uttalte i april at han hadde inngått ein avtale med Russlands president Vladimir Putin om lauslating av Savtsjenko.

Den 34 år gamle ukrainske jagarflygaren vart i mars dømt til 22 års fengsel for medverking til drap på to russiske journalistar i Aust-Ukraina i 2014. Det er ei skulding ho sjølv blankt avviser.

Savtsjenko var på den tida medlem av ei paramilitær gruppe som kjempa mot dei prorussiske opprørarane i Aust-Ukraina. Ho har tidlegare tenestegjort som helikopternavigatør i det ukrainske militæret.

Rettssaka mot henne er blitt omtalt som politisk motivert av både europeiske styresmakter og menneskerettsgrupper. (©NPK)