Nyland beheld plassen – Aursnes inn i laget mot Serbia

Ståle Solbakken gjer berre éi endring i startellevaren, og dessutan ei rokering. Fredrik Aursnes kjem inn for utestengde Kristian Thorstvedt. Aursnes går inn i ankerrolla på midtbanen, medan Sander Berge rykkjer ein plass til venstre og tek indreløparrolla Thorstvedt hadde i Ljubljana.

I dei fire nasjonsligakampane i juni hadde Aursnes og Berge ankerrolla annankvar gong, og slik vart det denne gongen òg.

1-2-tapet i Slovenia var den første kampen til Nyland sidan landskampane i juni. Han avviste sjølv bestemt at manglande kamptrening bidrog til baklengsmålet dei fleste beskreiv som ein keepertabbe. Ifølgje TV 2 fekk han allereie måndag beskjed av Solbakken om at han skal stå mot Serbia.

Marcus Holmgren Pedersen er klar igjen etter skade og kortkarantene, men må nøye seg med plass på benken. Omar Elabdellaoui vart den som måtte på tribunen som overtalig i troppen. Julian Ryerson overtek draktnummeret hans, nummer 14.

Noreg treng minst uavgjort mot Serbia for å bli gruppevinnar og rykke opp til A-divisjonen. Då blir Noreg også seeda på nivå 2 i EM-trekkinga og vil vere garantert ein ekstrasjanse til EM-plass om laget ikkje lykkast i den ordinære kvalifiseringa. Med tap ryk opprykket, men med gunstige resultat i eit par andre kampar kan laget likevel hamne på seedingnivå 2.

Farlege spelarar

Dei seks måla til Erling Braut Haaland gjer han til den mestskårande spelaren i nasjonsligaen i år, uansett divisjon og gruppe. Berre eitt mål bak følgjer den serbiske stjernespissen Aleksandar Mitrovic, som deler 2.-plassen med to spelarar frå lag i lågare divisjonar. Haaland og Fulham-spelar Mitrovic er også nummer ein og to på skåringslista i Premier League, med høvesvis 11 og 6 mål.

Mitrovic har rista av seg skaden han fekk mot Sverige og får som venta med seg Juventus-spissen Dusan Vlahovic på topp. Bak seg har dei Ajax-playmaker Dusan Tadic, ein farleg trio for Noreg.

Medan Thorstvedt er den einaste norske spelaren med kortkarantene, må Serbia greie seg utan to spelarar som fekk gult kort i førre kamp. Det er Sergej Milinkovic-Savic (Lazio) og Uros Rakic (Braga). Førstnemnde vart banemannen til Noreg med to skåringar då Serbia vann 2–1 på Ullevaal i nasjonsligaomspelet om EM-plass for to år sidan.

Landslagssjefen til Serbia, Dragan Stojkovic, har endra på tre plassar jamført med 4-1-sigeren over Sverige laurdag. Milos Veljkovic og Strahinja Pavlovic erstattar Erhan Masovic og Srdjan Babic i stoppartrioen, medan Ivan Ilic kjem inn for utestengde Milinkovic-Savic.

Slik er laga på Ullevaal:

Noreg (4-5-1):

1 Ørjan Nyland – 14 Julian Ryerson, 21 Andreas Hanche-Olsen, 15 Leo Østigård, 5 Birger Meling – 19 Alexander Sørloth, 10 Martin Ødegaard, 16 Fredrik Aursnes, 8 Sander Berge, 11 Mohamed Elyounoussi – 9 Erling Braut Haaland.

Reservar: 12 André Hansen, 13 Sten Grytebust – 2 Morten Thorsby, 3 Kristoffer Ajer, 4 Stian Gregersen, 6 Patrick Berg, 7 Ola Brynhildsen, 17 Fredrik Bjørkan, 18 Kristoffer Zachariassen, 20 Mats Møller Dæhli, 22 Marcus Holmgren Pedersen, 23 Jørgen Strand Larsen.

Serbia (3-4-1-2):

23 Vanja Milinkovic-Savic – 5 Milos Veljkovic, 13 Stefan Mitrovic, 2 Strahinja Pavlovic – 14 Andrija Zivkovic, 16 Sasa Lukic, 8 Ivan Ilic, 17 Filip Kostic – 10 Dusan Tadic – 9 Aleksandar Mitrovic, 18 Dusan Vlahovic.

Reservar: 1 Marko Dmitrovic, 12 Marko Ilic – 3 Filip Mladenovic, 4 Srdjan Babic, 6 Nemanja Maksimovic, 7 Nemanja Radonjic, 11 Luka Jovic, 15 Strahinja Erakovic, 19 Erhan Masovic, 20 Aleksa Terzic, 21 Filip Duricic, 22 Darko Lazovic.

Dommar: Antonio Mateu Lahoz, Spania.

(©NPK)

Ørjan Nyland får tillit som Noreg-keeper i gruppefinalen mot Serbia i nasjonsligaen. Foto: Fredrik Varfjell / NTB