Nytt landemerke opnar på Gaularfjellet i sommar

(NPK-NTB): I juni opnar Statens vegvesen den nye turistvegattraksjonen Utsikten, eit utkikkspunkt som balanserer på kanten av Gaularfjellet.

Betonglandemerket ligg på Gaularfjellet, som er ein av dei 18 nasjonale turistvegane i Noreg. I tillegg til å vere eit utkikkspunkt 700 meter over havet, inneheld Utsikten amfi, toalett og parkering.

Det er lagt opp til at besøkjande kan bevege seg ut i terrenget, rundt og til dels under utsiktsplattforma, opplyser Statens vegvesen, som er byggherre for prosjektet. Arkitektane i Code vann konkurransen om å planleggje Utsikten i 2008.

– Ambisjonen var å famne heile rasteseansen i eit stort grep med større mangfald, fortel arkitekt Eivind Nygaard i Code. (©NPK)