Økokrim tapte i ulverettssaka

(NPK-NTB): Det er ikkje grunnlag for å bruka mafiaparagrafen mot dei fem jegerane som stod tiltalt for ulovleg ulvejakt, slår Eidsivating lagmannsrett fast.

npk@npk.no

Publisert: 05.04.2016 kl 16:43

Sist oppdatert: 05.04.2016 kl 17:07

Lagmannsretten har sett ned straffene mot fire av dei fem tiltalte jegerane og frikjent den siste, skriv TV 2.

49-åringen, som av Økokrim karakteriserte som hovudmannen og initiativtakaren til ulvejakta, har fått redusert straffa frå eitt år og åtte månader til ni månader.

Dei tre andre fekk også kraftig nedgang i straffa dei fekk i Sør-Østerdal tingrett.

Alle fire misser jaktretten i tre år.

– Lagmannsretten fann bevist at alle fire hadde vore med i jakt etter ulv ved Bjørnåsen i Elverum kommune i februar 2014. Den hovudtiltalte blei også dømd for å ha skote ein ulv under åtejakt etter rev i Åmot ein månad seinare. Begge tilfella skjedde i den såkalla ulvesona, der ulven har eit særskilt sterkt vern, heiter det i ei pressemelding frå Eidsivating lagmannsrett.

Økokrim vil at alle dei tiltalte jegerane skulle sona frå seks månader til to år i fengsel, og mista jaktretten i fleire år.

TV 2 har vore i kontakt med Økokrim, som ikkje ønskjer å kommentera saka før dei formelt har fått dommen.