Elabdellaoui etter tøff reise: – Har vore gjennom mykje

Tabelltopp Noreg møter Slovenia borte laurdag og Serbia heime tre dagar seinare. Begge oppgjera inngår i Uefas nasjonsliga nivå to.

Nyttårsaftan for vel halvtanna år sidan pådrog Elabdellaoui seg skadar i auga under nyttårsfeiring i Tyrkia. Dette skjedde etter at fyrverkeri gjekk av og trefte han i ansiktet.

14 månader seinare gjorde han comeback for Galatasaray, men kontrakten hans vart terminert tidlegare i haust. 30-åringen står utan klubb og har trena med Lillestrøm den siste tida.

Viss Elabdellaoui kjem på banen dagane som kjem, vil han gå inn i klubben for spelarar med 50 A-landskampar eller fleire. Den har i dag 50 medlemmer og blir toppa av John Arne Riise med 110.

Bestemt

Han seier at han tidleg var bestemd på at han skulle komme seg tilbake på banen.

– Det kjennest utruleg herleg å vere tilbake. Dette betyr utruleg mykje for meg. Eg har vore gjennom mykje. På same måte som eg har venta lenge med å vere tilbake på trening, så har eg venta lenge på landskamp nummer 50, svarte Elabdellaoui på spørsmål frå NTB under pressetreffet på Lillestrøm.

Han nyttar briller både i trening og kamp, men seier at synet er heilt restituert etter ei rekkje operasjonar.

– Synet er 100 prosent, alt er bra. Brillene er meir for vern, sa Elabdellaoui.

Han fortalde om ei tøff tid der han ei stund «levde på minner» fordi han i periodar ikkje kunne sjå.

Tøft

Han veit at kampen om ein plass på laget er tøff. Ting har endra seg sidan sist han var med på landslaget.

– Den største forskjellen er at vi har ei verdsstjerne (i Erling Braut Haaland). Vi har også ein Martin Ødegaard som er kaptein for ein stor klubb. Det er stor forskjell frå sist gong eg var med, sa Elabdellaoui.

Landslagssjef Ståle Solbakken er usikker på kvar han har den tidlegare landslagskapteinen.

– Eg veit eigentleg ikkje eksakt der Omar står. Eg såg han i «preseason». Då såg det veldig bra ut, men det er ganske lenge sidan, sa Solbakken til NTB.

Elabdellaouis klubbframtid er ikkje avklart. Han tek ikkje berre omsyn til seg sjølv, men kona og dei tre barna deira er viktige element når hans neste kontrakt skal underskrivast.

(©NPK)

Omar Elabdellaoui under ein pressekonferanse med herrelandslag i fotball før nasjonsligakampane mot Slovenia og Serbia. Foto: Beate Oma Dahle / NTB

Omar Elabdellaoui under landslagstreninga i fotball måndag. Foto: Fredrik Varfjell / NTB

Omar Elabdellaoui nyttar briller under trening og kamp. Foto: Fredrik Varfjell / NTB