Omfattande kvalteljing er i gang

– Kvalteljarane brukar visuelle metodar og er avhengige av brukbare observasjonsforhold. Så langt har vi ikkje vore særleg heldige med vêret. Hittil har vi observert vågekval, nebbkval, finnkval, knølkval, spermkval og spekkhoggar, og når vi kjem oss vest av Jan Mayen, reknar vi med at vi også får møte blåkval, skriv Havforskingsinstituttet (IMR).

Det blir brukt både båt og fly til kvalteljinga, som skjer etter den såkalla mosaikkmetoden. Det tyder at teljinga skjer i ulike delar av Nordaust-Atlanteren frå det eine året til det andre.

– Etter seks år vil denne metoden gi oss komplett dekning av alle aktuelle havområde i Nordaust-Atlanteren. Det gjer det mogleg å berekne kvotane for vågekvalbestandane som Noreg fangstar på, opplyser IMR. (©NPK)