Opptil 132.000 køyretøy risikerer avskilting

(NPK-NTB): Skatteetaten har sendt ut vedtak om avskilting og registreringssperre til eigarar som ikkje har betalt årsavgift for køyretøy i år.

npk@npk.no

Publisert: 06.06.2016 kl 13:38

Med 132.000 køyretøy som risikerer avskilting, er del ubetalte krav på same nivå som i 2015, opplyser skatteetaten. Dette er første gong etaten sender ut vedtak om avskilting etter overtakinga av ansvaret for årsavgifta frå tolletaten ved nyttår.

Alle som betaler årsavgifta etter forfallsdato, må betale ei tilleggsavgift på 250 eller 50 kroner, avhengig av køyretøytype. Når årsavgifta og tilleggsavgifta er registrert betalt, trekkjer skatteetaten avskiltingsvedtaket.

Blir køyretøyet kontrollert på vegen, kan skilta bli verande på dersom eigaren betalar årsavgifta, tilleggsavgifta og eit gebyr på 900 kroner på staden. Dersom køyretøyet blir avskilta og eigaren ønskjer å få skilta tilbake, må eit påskiltingsgebyr på 1.460 kroner betalast til Statens vegvesen.

I september vil Statens innkrevjingssentral begynne tvangsinnfordring mot dei som enno ikkje har betalt.

Alle køyretøy som var registrert fredag 1. januar i år, er årsavgiftspliktige i 2016. Det er ikkje fritak for avgifta for køyretøy som vart avskilta, med mindre eigaren leverte det til vraking seinast måndag 21. mars 2016. Det er halv avgift ved vraking før fredag 1. juli

Dersom eigaren leverer køyretøyet til vraking i perioden tysdag 22. mars til og med torsdag 30. juni, betalar skatteetaten halv avgift tilbake til den siste registrerte eigaren. (©NPK)