Oslo Børs henta seg varsamt inn igjen

Ved opningstider såg det ut til å bli endå ein dag med nedgang, men børsen tok seg opp igjen utover dagen. Det same gjorde oljeprisen, som ved 16.40-tida er oppe på 103,32 dollar fatet, ein dryg prosent betring siste døgn.

Oljegiganten Equinor heldt fram fallet sitt og enda ned 0,19 prosent, medan Norsk Hydro på si side henta seg betydeleg inn med ein oppgang på 2,25 prosent. Yara enda ned 0,54 prosent, DNB opp 0,33 prosent og Rec Silicon ned 4,92 prosent på ein blanda børs.

Også børsane elles i Europa henta seg varsamt inn etter ein bekmørk måndag. DAX 30-indeksen i Frankfurt er opp 0,34 prosent, CAC 40 i Paris er opp 0,43 prosent, og FTSE 100 i London er opp 0,20 prosent.

Verre ser det ut til å bli i USA der dei tonegivande indeksane på Wall Street alle opnar ned tysdag ettermiddag norsk tid. Den breie S&P 500-indeksen fell 1,53 prosent. Industriindeksen Dow Jones fell 1,07 prosent, og teknologitunge Nasdaq fell 2,37 prosent, skriv Dagens Næringsliv.

(©NPK)

Oslo Børs henta seg forsiktig inn tysdag.
Foto: Håkon Mosvold Larsen / NTB / NPK