Oslo Grand Prix-vinnar dopingavslørt

(NPK-NTB): Your Highness, årets vinnar av travløpet Oslo Grand Prix, har avlagt positiv dopingprøve, melder Trav og Galopp-Nytt.

npk@npk.no

Publisert: 09.09.2016 kl 09:02

Ifølgje TGN skal hesten ha fått i seg grunnstoffet kobolt, som blant anna kan brukast for å gi ein EPO-effekt.

Representantar frå Svensk Travsport og Det Norske Travselskap var måndag på besøk på garden til den franske travtrenaren Fabrice Souloys i Normandie.

Der la dei fram bevis for at hestane Your Highness, UN Mec d'Heripre og norske Lionel testa positivt under Oslo Grand Prix. Hestane har vore Souloys ansvar.

Først blei det meldt at alle hestane under OGP hadde testa negativt, men ifølgje TGN blei prøvene nyleg testa på nytt. Nedfrysing og retesting gjer antidopingarbeidet sikrare.

Det Norske Travselskap held pressekonferanse fredag. Der vil styreleiar Svein Morten Buer, sjefveterinær Anne V. Wangen og leiar for hestesportens utval for utgreiing av dopingsaker, Birgit Ranheim, vere til stades. (©NPK)