Over 100.000 sysselsette i norsk sjømatnæring
Sjømatnæringa opplevde ein sterk vekst i fjor og talet på sysselsette har passert 100.000. Næringa står no for rundt 3 prosent av skatteinntektene til staten.
Talet på sysselsette auka med 13.000 personar til 105.900 som direkte og indirekte jobbar i næringa. Inkludert ringverknadene var verdiskapinga på 120 milliardar kroner, og skatteeffekten utgjorde 34 milliardar kroner.
Det kjem fram i ein ny rapport frå Menon Economics, Nofima og Norce. Ifølgje rapporten er veksten i havbruksnæringa den største vekstdrivaren.
– No har vi fasiten for 2021, og vi ser at næringa har løfta seg og set nye rekordar for verdiskaping, eksport og sysselsetjing, seier analyseansvarleg Jonas Erraia i Menon Economics.
Sjømatnæringa er blant Noregs viktigaste distriktsnæringar og næringa har mest å seie for verdiskaping og sysselsetjing i Vest- og Nord-Noreg.
I Vestland er rundt 17.200 personar direkte eller indirekte sysselsett i sjømatnæringa, følgt av Møre og Romsdal med 16.500, Nordland med 12.900, Troms og Finnmark med 12.700, Trøndelag med 12.100 og Viken med 10.800 personar.
Den samla skatteeffekten i 2021 var på 34 milliardar kroner, rundt 4 milliardar meir enn i 2020. Noregs samla skatteinntekter var i 2021 på om lag 1.100 milliardar kroner, og dermed utgjer direkte og indirekte skattar frå sjømatnæringa rundt tre prosent av skatteinntektene til staten.
(©NPK)
Sjømatnæringa er blant Noregs viktigaste distriktsnæringar og næringa har størst betydning for verdiskaping og sysselsetjing i Vest- og Nord-Noreg. Her frå eit anlegg for lakseoppdrett med i Sjona, på Helgelandskysten.
Foto: Gorm Kallestad / NTB/ NPK