Over 300 oljeservicetilsette tekne ut i streik

Partane mekla 3,5 timar på overtid før det enda med brot natt til onsdag.

– Vi streikar fordi Norsk olje og gass ikkje viser nokon som helst vilje til å kome oss i møte, seier områdeleiar Ommund Stokka i Industri Energi.

Det første streikeuttaket gjeld om lag 310 medlemmer fordelt på fem bedrifter: Schlumberger, Baker Hughes, Halliburton, Oceaneering og Oceaneering Asset Integrity.

Streiken startar onsdag klokka 7 og vil i hovudsak råke miljøhandtering av boreavfall, noko som kan medføre stans i enkelte boreoperasjonar. Ein konflikt vil ikkje umiddelbart råke produksjonen av olje og gass på norsk sokkel, ifølgje Norsk olje & gass.

– I første omgang tek vi ut eit avgrensa tal medlemmer, men det ligg an til opptrapping av streiken viss det blir nødvendig, seier forbundssekretær og ansvarleg for oljeserviceavtalen i Industri Energi, Einar Johannessen.

– Det er slik at ein ikkje trur det er mogleg. I eit år der om lag 40.000 menneske har mista arbeidet i oljeindustrien og selskapa vurderer ytterlegare nedbemanning, går Industri Energi til streik for å få langt høgare lønnstillegg enn alle andre grupper i det norske samfunnet. Dette er totalt uansvarleg, seier administrerande direktør Karl Eirik Schjøtt-Pedersen i Norsk olje og gass.

Arbeidsgivarorganisasjonen opplyser at dei oljeservicetilsette som det er blitt forhandla for, har ein snittlønn på rundt 630.000 kroner i året. I tillegg blir det utbetalt tekniske tillegg og overtid på opptil fleire hundre tusen kroner.

– Dei burde vist meir solidaritet overfor dei mange som no risikerer å miste jobben. Å vere nøkterne er det som bevarer arbeidsplassar slik situasjonen er no. Dessverre svarer Industri Energi med krav som overgår alle ansvarlege rammer, seier forhandlingsleiar Jan Hodneland i Norsk olje og gass.(©NPK)