Politiet: – Har ikkje gitt opp Tina-saka

– Vi har ikkje gitt opp å løyse Tina-saka. Vi har håp om at vi i framtida skal klare å løyse denne saka. Men per no har vi ikkje ei eiga gruppe som jobbar med saka, seier Bjørn Kåre Dahl, leiar av personseksjonen i Sør-Vest politidistrikt på ein pressekonferanse måndag formiddag.

Saman med politiadvokat Herdis Traa heldt han ei kort orientering etter at Riksadvokaten avgjorde å legge vekk saka mot dei fire mennene i 30-åra som sidan i fjor haust har vore sikta for drapet på 20 år gamle Tina Jørgensen i 2000.

Politiet foreslo opphavleg at saka burde leggjast vekk på bevisets stilling. Riksadvokaten opplyser at dei har valt å grunngi vekklegginga med det meir uvanlege «inkje straffbart forhold» for å understreke at ingen av dei fire er mistenkte for å ha noko med drapet å gjere.

– Sjølv om dette er ei litt anna vekkleggingskode enn det politiet og statsadvokaten innstilte på, er vi einige i realitetane om at det ikkje lenger heftar nokon mistanke mot dei tidlegare sikta i saka, seier Herdis Traa. (©NPK)