Politiet ber Kripos sjå på Espås-saka med nye auge

Måndag neste veke er det 20 år sidan kvinna frå Orkanger blei valdteken og drepen i utkanten av turistbygda Geiranger på Sunnmøre.

– Drapet på Trude Espås i Geiranger har aldri vore lagt vekk frå politiet si side. Det kjem framleis inn nye tips som blir etterforska. Men dessverre har vi ikkje greidd å finne gjerningsmannen, seier politimeister Ingar Bøen i Møre og Romsdal til Avisa Sør-Trøndelag.

Ifølgje avisa er det digitaliseringa av heile det omfattande etterforskingsmaterialet som gjer det mogleg for Kripos å kunne etterforske saka med den nye eininga for alvorlege uoppklara saker.

Det omfattande etterforskingsarbeidet, som blant anna har innebore registrering av 5.000 personar som oppheldt seg i Geiranger på drapstidspunktet, avhøyr av over 3.000 menneske i 37 land og lagring av 15.000 turistbilete, har ikkje ført fram.

Saka har vakt engasjement, og har vore framme i lyset fleire gonger. Seinast i TV 2s dokumentar «Åsted Norge» frå januar i år. (©NPK)