Politiet har rulla opp stor narkoliga på Sørlandet

Agder politidistrikt har i ein periode overvaka miljøet med hjelp frå nabodistrikta. I tillegg til dei som blei arrestert, mistenkjer politiet at rundt hundre personar er involvert, fortel TV 2.

23-åringen som blir rekna for å vera hovudmannen, blei arrestert i byrjinga av november i fjor. I tillegg til 23-åringen som er varetektsfengsla, er ti medhjelparar i tillegg til 17 mottakarar eller underseljarar av narkotikaen, arresterte. Den yngste er under 18 år.

– Under det som blir rekna for å vera hovudmannen, er det opptil ti medhjelparar som mellom anna skal ha køyrt ut dopet til Flekkefjord i vest og Risør i aust. Vi mistenkjer også 17 personar som er mottakarar, seier politiadvokat Jørgen Henriksen i Agder politidistrikt.

Politiet har beslaglagt dyre bilar som dei meiner er brukt for å køyra amfetamin og hasj til skogsdepot over heile Sørlandet. Minst fem slike stader skal ha blitt brukt.

Dei forseggjorde amfetaminpakkane er merkte med ein kobraslange og ein kjemiske formel. Politiet seier dei nesten minner om noko henta frå TV-serien «Breaking Bad».

– Vi har aldri opplevd liknande og etter det eg kjenner til, har vi aldri sett slik merking av narkotika i Noreg tidlegare, seier politioverbetjent Thor Atle Pedersen, avsnittsleiar for organisert kriminalitet i Agder politidistrikt.

Ifølgje forsvararen til den hovudsikta, advokat Knut Ditlev-Simonsen, har klienten hans vedgått noko, men er ikkje samd i omfanget politiet tillegg saka. (©NPK)