Politiet innfører flyforbod over Skien fengsel

– Vi ønskjer ikkje at dronar eller småfly skal henge over fengselet under rettssaka, seier politistasjonssjef Annie Sandersen i Grenland til Varden.

Anders Behring Breivik har saksøkt staten for brot på menneskerettane, og Oslo tingrett behandlar av tryggingsomsyn og praktiske årsaker saka i eit provisorisk rettslokale i høgsikringsfengselet i Skien, der Breivik soner. Saka startar tysdag 15. mars, og retten har sett av fire dagar til behandlinga.

Flyforbodet får ei utstrekning på vel 4,5 kilometer og 2.500 fot, og gjeld frå 14. til 18. mars.

– Forbodet gjeld all flyging i sona, både fartøy med førar og fartøy utan førar, opplyser fungerande leiar for politiet i Telemark Rita Kilvær i eit brev til Norway ACC og Luftfartstilsynet. (©NPK)