Politiet kan få kamera på uniforma

Ein rapport etter forsøka med tolv kamera anbefaler lydopptak, men er meir skeptisk til video, skriv Aftenposten. Datatilsynet er glad for at politiet gjer ei edrueleg vurdering av moglegheitene og utfordringane.

– Vi kan godt sjå situasjonar der bruk av kamera er fornuftig som for eksempel ved skarpe oppdrag. Til heilt ordinær ordensteneste kan dette fort vise seg å koste meir enn det smakar. Det vil krevje veldig mykje av rutinar, opplæring og teknisk tryggleik. Politiet vil også måtte ta omsyn til krav om innsyn i opptaka, seier kommunikasjonsdirektør Ove Skåra i tilsynet.

Kåre Stølen, som er sjef på Grønland politistasjon, trur kroppskamera kan bli ein nyttig reiskap og seier tilbakemeldingane etter prosjektet i Oslo var positive. Politiets Fellesforbund meiner det er positivt med videoopptak som kan frikjenne eller dømme politifolk når det blir retta skuldingar mot dei.

– Mange opplever belastinga ved grunnlause politimeldingar, og video vil bekrefte eller avkrefte kva som eigentleg skjedde, seier forbundsleiar Sigve Bolstad i PF. (©NPK)