Raiola samanliknar Haaland med Lewis Hamilton

Det norske stjerneskotet var eitt av temaa under Raiolas intervju med BBC, der agenten valde å samanlikne nordmannen med eitt av dei aller største idrettsnamna i verda.

Lewis Hamilton har vunne rekordmange løp i Formel 1 (95). Han tangerte i 2020 legenda Michael Schumacher i talet på samanlagtsigrar (sju), og han har fått OBE-orden av dronning Elizabeth ll. Likevel finn agenten likskapar mellom Formel-1-sportens mestvinnande og ein jærbu frå vesle Noreg.

– Eg trur ikkje det er ein sportsdirektør eller trenar i verda som ville sagt nei til Haaland. Det er som å seie at eit Formel-1- lag ikkje ville hatt Lewis Hamilton, seier Raiola.

Han hevdar at det er høgst ti klubbar i verda som har råd til å kjøpe Haaland og samtidig gi han plattforma som trengst etter Dortmund-opphaldet. Han fyrer samtidig opp om kvar karrieren kan gå vidare.

– Fire av dei ti klubbane er i England, seier han.

(©NPK)

Agenten til Erling Braut Haaland sparer ikkje på godorda om nordmannen. Foto: Martin Meissner / POOL / AP / NTB