Rajoy går for spansk koalisjonsregjering

(NPK-NTB-AFP-Reuters): Den spanske statsministeren Mariano Rajoy seier han vil prøve å danne ei koalisjonsregjering, sjølv om partiet hans gjekk kraftig tilbake i valet søndag.

npk@npk.no

Publisert: 21.12.2015 kl 08:14

Det konservative Partido Popular er framleis det største partiet i Spania, men får berre 123 seter i nasjonalforsamlinga, langt unna dei 176 seta som er nødvendig for reint fleirtal. Dermed er PP avhengig av andre parti for å bli sitjande med makta.

– Eg vil prøve å forme ei regjering, ei stabil regjering, sa Rajoy til støttespelarane som hadde samla seg utanfor partihovudkvarteret i Madrid natt til måndag.

– Vi må ha mange samtalar, forhandle og komme til semje, la han til mens folkemassane ropte «Spania! Spania!».

Samtidig understreka han at det er viktig å halde oppe reformene som har sendt økonomien i landet på rett kurs.

– Vi vil bli avgjerande i utforminga av ein administrasjon som kan endre dette landet, sa Ciudadanos-leiar Albert Rivera etter at det vart klart at partiet har sikra seg 13,9 prosent av stemmene og 40 sete i nasjonalforsamlinga.