Rasa mot muslimar under hijab-rettssak

Det var sett av tre timar torsdag morgon til saka mot frisør Merete Hodne. Ho er tiltalt for å ha nekta muslimen Malika Bayan tilgang til salongen sin fordi Bayan hadde på seg hijab. Rettssal 1 i Jæren tinghus var fylt med støttespelarar, og partane i saka stod tydeleg steilt mot kvarandre.

I ein pause i rettssaka konfronterte Jan Skoland frå Lyngdal Bayan og vennene hennar med sitt syn på islam og Koranen. Han vart etter kvart så høgrøysta at retten, som var i gang igjen bak døra, måtte gi beskjed om at han måtte roe seg. Det vart vanskeleg å høyre kva som vart sagt i rettssalen.

Bayan og vennene hennar parerte skuldingar og utsegner og fekk applaus frå fleire tilhøyrarar rundt, noko som syntest å provosere Skoland enda meir.

– Eg veit veldig mykje om dette og har skrive mykje om islamisering på nettet. Eg reagerer sterkt på naiviteten det norske samfunnet har overfor islam, seier han til NTB.

– Muslimane kjem til demokratia, bruker stemmeretten og tar over og forbyr demokratiet. Det har eg mange eksempel på. (©NPK)