Redd Barna: – Listhaug er streng, men ikkje rettferdig

– Det vi ser på Storskog no, og den behandlinga Noreg gjev barnefamiliar på flukt og i krise, er uverdig, seier generalsekretær Tove Wang i Redd Barna, til NTB.

Organisasjonen reagerer kraftig på behandlinga asylsøkjande barnefamiliar i Finnmark får av norske styresmakter.

– Når vi ser foreldre med barn på flukt frå norsk politi fordi dei er livredde, så må vi reagera. Regjeringa viser ei total ansvarsfråskriving for menneske på flukt, seier Wang.

– Listhaug er streng, men ikkje rettferdig. Å senda livredde barn inn i ytterlegare uvisse i Russland. Kor rettferdig er det? spør generalsekretæren.

Ho meiner Noreg må lytta til FNs høgkommissær for flyktningar (UNHCR) som meiner Russland ikkje har eit fungerande asylsystem.

– Norske styresmakter svarer med tåkeprat og kan ikkje garantera at dei asylsøkjarane som blir returnerte til Russland er trygge der. I verste fall kan Noreg bidra til at barnefamiliar blir sende tilbake til land i krig og konflikt.

Noreg har også fått kritikk frå FN for å returnera asylsøkjarar som kjem frå Russland over grensa ved Storskog utan at dei har fått vurdert asylsøknadene sine. (©NPK)