Rekordhøg breibandsdekning i heile landet

Det viser nye tal frå Nasjonal kommunikasjonsmyndigheit (Nkom) torsdag.

Det er særleg talet på husstandar med tilbod om gigabit fart (1.000 megabit ber sekund) som har auka kraftig det siste året. Dette talet har gått opp med 33 prosentpoeng frå 2020 til 2021.

– Vi har nådd målet vi sette oss i 2016, og er no på full fart mot gigabitsamfunnet, seier distrikts- og digitaliseringsminister Linda Hofstad Helleland (H).

Tala viser òg ein sterk auke i fiberdekninga i grisgrendte område. Per første halvår har 64 prosent av husstandane i grisgrendte strøk tilbod om fiber – snautt 9 prosentpoeng opp frå i fjor.

23 prosent har 56

Ved utgangen av første halvår 2021 har 23,3 prosent av befolkninga tilgang til 5G utandørs på bustaden sin, ein auke frå 5,4 prosent året før.

Det meste av utbygginga har skjedd i byområde og tettstader. Helleland seier planen er å betre dekninga i distrikta.

– Her vil distriktspakken vi tilbaud i 5G-auksjonen, som legg til rette for 480 millionar kroner til utbygging av raskt trådlaust breiband i distrikta, ha mykje å seie, forklarer ho.

Altibox tek innpå

Telenor og Altibox har samla sett 61,3 prosent av alle breibandabonnementa i privat- og bedriftsmarknaden ved utgangen av første halvår 2021.

Telenors del går ned og var 32,5 prosent på dette tidspunktet i fjor, mot 32,4 prosent i år, medan Altibox-partnarane aukar sin marknadsdel til 28,8 prosent.

Også i mobilabonnements-marknaden taper Telenor terreng. Telenor hadde 45 prosent av totalen ved utgangen av første halvår 2021, medan Ice og ei rekkje mindre tilbydarar under samleposten «øvrige» er dei som tek fleire marknadsdelar.

Kraftig auke i mobildata

Taletrafikken på mobiltelefon held seg nokolunde stabilt på 9,2 milliardar trafikkminutt i første halvår 2021. Ei endring under pandemien er at 88 prosent av trafikken går mellom mobiltelefonar innanlands, ein kraftig auke frå tilsvarande periode i 2019.

Datatrafikken innanlands auka med om lag 71 petabyte (ein billiard byte) frå første halvår 2020 til same periode i 2021.

Ein aukande del av datatrafikken blir generert frå mobiltelefonabonnement. 78 prosent av innanlandsk datatrafikk vart generert frå mobiltelefonabonnement i første halvår 2021.

Datatrafikk ved bruk av mobilnett i utlandet var mindre enn 3 petabyte i første halvår 2021, vesentleg lågare enn for nokre år sidan. Denne nedgangen kan knytast til reiserestriksjonar i samanheng med pandemien, meiner Nkom.

(©NPK)

Distrikts- og digitaliseringsminister Linda Hofstad Helleland (H) seier at regjeringa har nådd målet dei sette seg i 2016.
Foto: Stian Lysberg Solum / NTB / NPK