Rift om billettane til historisk skøyte-VM på Hamar
På tre timar vart det selt 15.000 billettar til skøyte-VM på Hamar, som blir VM-historias første kombinerte sprint- og allroundmeisterskap.
Verdsmeisterskapen blir arrangert i Vikingskipet frå 28. februar til 1. mars kommande år.
- Dette blir den største skøytefesten i Noreg på mange år og er ein stor motivasjonsfaktor for alle løparane våre denne sesongen. VM på heimebane er ikkje noko ein opplever så mange gonger i ein skøytekarriere, seier sportssjef Lasse Sætre i ei pressemelding.
Generalsekretær Håkon Dahl i skøyteforbundet opplyser til NTB at 12.000 billettar framleis er tilgjengeleg for sal.
I sprint-VM i år tok Håvard Holmefjord Lorentzen bronse på 1000 meter. I Vikingskipet skal bergensaren prøve å sikre seg edlare metall. Sportssjef Sætre opplyser at dei norske løparane er godt i rute før sesongstart.
- Eg merkar at stemninga blant utøvaren er veldig god og at mange er gira på å vise seg fram på Hamar, fortel han.
Førre verdsmeisterskap Hamar arrangerte, var allroundmeisterskapet i 2017.
(©NPK)
Håvard Holmefjord Lorentzen skal prøve å kjempe om gull når skøyte-VM blir arrangert på Hamar i vinter. Det blir det første kombinerte sprint- og allroundmeisterskapet i VM-historia. Foto: Harald Wisthaler / NTB scanpix
Lasse Sætre er sports- og utviklingssjef i Norges Skøyteforbund. Foto: Håkon Mosvold Larsen / NTB scanpix