Røkkes straumgjerde i strandsona fjerna

Gjerdet gjekk langs vestsida av eigedommen, men det var ikkje søkt om å få sette det opp. Gjerdet gjorde det umogleg å kome seg inn på tomta og hindra dermed fri ferdsel, skriv VG.

Røkke kjøpte eigedommen på idylliske Konglungen i 2004, men reguleringsplanen tillèt ikkje gjerde nær sjøen på denne tomta. Det stod derimot eit gammalt gjerde på tomta frå før som han fekk behalde, men det gjekk ikkje heilt ned til stranda. Både på toppen av det gamle gjerdet og på det nye blei det montert ein straumførande del.

Dagen etter at Asker kommune i august blei gjort oppmerksam på gjerdet, sørgde kommunen for å få det fjerna. Kommunen seier det heile handlar om at mange ferdast langs sjøen, og at ein ikkje ønskjer at det skal vere store konstruksjonar og fysiske barrierar heilt nede i strandsona.

– Det blei sett opp eit gjerde i fjor sommar på grunn av problem med rådyr. Etter ei synfaring med kommunen for ein månads tid sidan, blei gjerdet teke ned. Dette er derfor ei avslutta sak, og vi har ingen fleire kommentarar, skriv Røkkes private pressetalsmann Rolf Nereng i ein e-post til avisa. (©NPK)

Kjell Inge Røkke fotografert under opninga av Skulpturparken i Akerkvartalet, hovudkontoret til Aker på Fornebu, i juni. Foto: Lise Åserud / NTB scanpix / NPK