Klargjør siden...

Romfararar installerer parkeringsplass i verdsrommet

(NPK-NTB-AFP): Romskipstrafikken dei kommande åra er venta å auke. Derfor skal amerikanske astronautar no installere ein ny «parkeringsplass» på den internasjonale romstasjonen ISS.

Amerikanarane Jeff Williams og Kate Rubins skal ta steget ut i verdsrommet for å feste landingsplassen fredag, nok NASA omtalar som «ei metaforisk oppkøyrsel til framtida».

Romvandringa vil starte klokka 14.05 norsk tid, og vil vere Williams' fjerde romvandring og Rubins første.

Den nye samankoplingsmekanismen gjer det mogleg for ein ny generasjon av amerikanske romfartøy å frakte astronautar til ISS, etter at romferjeprogrammet vart avslutta i 2011. Endå ein parkeringsplass skal installerast i 2018.

Parkeringsplassen er meir avansert enn tidlegare og vil gjere det mogleg med automatisk parkering i staden for ordninga i dag der parkeringsprosessen blir styrt av astronautar. Den er laga av Boeing og vil passe til Boeings CST-100 Starliner og SpaceXs Crew Dragon, to romfartøy som er under bygging. (©NPK)

Annonse