United til Oslo utan Ronaldo – alle nysigneringane på plass

Det stadfesta United dagen før treningskampen. Ronaldo har gjennom sommaren stått over sesongoppkøyringa til dei raudkledde. No går det rykte om at han ynskjer seg bort frå klubben.

Portugisaren gjekk tidlegare fredag hardt ut mot media og skulda dei for å finne på saker om han.

– Det er umogleg å ikkje snakke om meg éin dag, elles tener ikkje pressa pengar. Dei veit at viss dei ikkje lyg, så får dei ikkje folkas merksemd. Hald fram med å prøve. Ein dag får de nokre nyheiter rett, skreiv portugisaren på Instagram.

Svikta

Ronaldo skulle etter planen vore tilbake på trening i starten av juli, men fekk ifølgje United fråvær av familiære årsaker. Det førte til at han droppa oppkøyringsturneen til klubben i Thailand og Australia.

37-åringen har eitt år igjen på kontrakten med United. I fjor sommar gjorde han comeback for klubben over eit tiår etter at han forlét den til fordel for Real Madrid.

Tysdag vart superstjerna avbilda på veg inn på Manchester Uniteds treningsanlegg saman med agenten sin Jorge Mendes. Der skal dei ha vore i samtalar med manager Erik ten Hag om framtida.

Eriksen til Noreg

Den franske midtstopparen Raphaël Varane glimrar også med sitt fråvær frå United-troppen som møte Atlético. 29-åringen har slite med ein skade gjennom sommaren og blir verande i England.

Med til Oslo er derimot nysigneringane Christian Eriksen og Lisandro Martínez. Begge spelte tidlegare i veka ein treningskamp bak lukka dører. Eriksen noterte seg då på skåringslista.

Allereie søndag ventar ein ny testkamp for Manchester United. Då står Rayo Vallecano på motsett banehalvdel på Old Trafford. Der det er venta at dei raude stillene med eit anteke svakare lag.

United landa på Gardermoen fredag kveld. Dette er spelarane klubben har med seg til Noreg:

Målvakter: David de Gea, Tom Heaton, Matej Kovar

Forsvarsspelarar: Diogo Dalot, Ethan Laird, Victor Lindelöf, Harry Maguire, Tyrell Malacia, Lisandro Martínez, Alex Telles

Midtbanespelarar: Christian Eriksen, Bruno Fernandes, Fred, James Garner, Scott McTominay, Facundo Pellistri, Donny van de Beek

Angriparar: Anthony Elanga, Anthony Martial, Marcus Rashford, Jadon Sancho.

(©NPK)

Cristiano Ronaldo er ikkje med Manchester United til Norge. Foto: Jon Super / AP / NTB

Manchester United-stjernene landa på Gardermoen fredag kveld. Det skjedde utan Cristiano Ronaldo, men nysigneringa Christian Eriksen (t.h. ved utgangsdøra) var derimot med til Noreg. Foto: Stian Lysberg Solum / NTB

Manchester United-manager Erik ten Hag går ut av flyet som landa på Gardermoen fredag kveld. Foto: Stian Lysberg Solum / NTB

Manchester United-profilane kom til Norge i godt humør. Foto: Stian Lysberg Solum / NTB