Rumenarar tekne for kortsvindel – politiet ber om tips

Dei fire – tre menn og ei kvinne – blei arresterte etter tips frå vektarar på kjøpesenteret på Moa onsdag denne veka, opplyser Sunnmøre politidistrikt.

Ifølgje politiet plukka rumenarane ut dyre varer som dei prøvde å betala med diverse kort. Der korta blei avvist, gjekk dei vidare til neste butikk. Enkelte stader lykkast dei med å få større transaksjonar gjennom. Nokre av personane opererte åleine, nokre var fleire saman innom butikkane, opplyser politiet.

Då dei fire blei arresterte, beslagla politiet eksklusive varer, som kle, Apple-produkt, parfyme og klokker.

– Vi har grunn til å tru at aktiviteten med kortsvindel har gått føre seg over to dagar i Ålesund og fleire dagar i Bergen og Stavanger, seier politiførstebetjent Lars Eirik Steinsland.

– I den samanhengen er vi interessert i informasjon frå butikkar i Ålesundsområdet som tysdag og onsdag denne veka har opplevd at utanlandske personar har prøvd å kjøpa dyre gjenstandar med kredittkort som har blitt avvist, held han fram. (©NPK)