Annonse

Russiske fotballpøblar arresterte i Tyskland

(NPK-NTB-AFP): Seks russiske fotballpøblar som kom frå Marseille i Frankrike, er arresterte i Köln der dei gjekk laus på spanske turistar.

Ifølgje tysk politi oppførte dei russiske fotballpøblane seg «ekstremt aggressivt og brutalt» då dei gjekk laus på to spanske turistar og ein turistguide. Dei tre vart slått og sparka og den eine av dei fekk alvorlege skadar.

Politiet greip fem av fotballpøblane på staden, men ein sjette stakk av. Han vart seinare gripen på Köln-Bonn-flyplassen idet han skulle gå om bord i eit fly.

Dei arresterte mennene er ifølgje tysk politi i alderen 26 til 30 år og hadde billettar til to av Russlands kampar i fotball-EM på seg. Dei hadde også med seg «typiske objekt nytta av fotballpøblar, blant anna masker og tannbeskyttarar».

Frankrike dømte tidlegare i veka tre russiske fotballpøblar til fengsel i inntil to år for å ha deltatt i samanstøytar etter kampen mellom Russland og England sist helg. 20 andre russarar vart deporterte frå Frankrike etter bråket. (©NPK)