Russland: 72 mål angripne i Syria torsdag

Det er ikkje kjent kva for mål som blei trefte. Russiske nyheitsbyrå viser berre til «militære mål», men bombingane skjedde i provinsane Hama, Idlib, Latakia, Aleppo og Deir al-Zor, og Damaskus, opplyser ein russisk militærtalsmann til nyheitsbyråa RIA og TASS.

Det russiske forsvarsdepartementet opplyser at eit rakettangrep var mot ei bru over Eufrat-elva som den såkalla Islamske staten (IS) bruker til å frakte forsyningar frå Irak til Syria.

Forsvarsdepartementet avviser samtidig amerikanske meldingar om at russarane har brukt klasebomber i tett folka område i Syria.

Torsdag la også den USA-leidde koalisjonen fram tal som viser at han gjennomførte 22 luftangrep i Syria og Irak onsdag. 14 av angrepa i Irak ramma opprørsposisjonar nær seks byar, og dei åtte andre måla var i Syria der blant anna eit oljeanlegg kontrollert av IS blei angripe, ifølgje ein uttale. (©NPK)