Ruud slo publikumsfavoritt i Wimbledon: – Var litt nervøs

Nordmannen fekk ein kanonstart på kampen, men måtte etter kvart kjempe godt for avansement til annan runde i årets utgåve av den prestisjetunge turneringa. Ruud vann med settsiffera 6-1, 5-7, 6-4, 6–3.

Lokoli vakna etter ein elendig start og gav Ruud god kamp om avansementet. Han fekk også publikum på si side og underheldt mykje i løpet av oppgjeret.

– Eg starta flott. Laurent var kanskje litt nervøs, og det var eg og, sa Ruud til arrangøren etter kampen.

Neste runde ventar britiske Liam Broady (142) for Ruud. Broady slo ein annan franskmann, Constant Lestienne, i den 1.-rundekampen sin.

– Eg skal spele utan så mykje press. Eg skal nyte kvar stund eg får spele på denne banen, sa nordmannen om vegen vidare.

Bane 1

Ruud og Lokoli fekk spele på bane 1 som følgje av at Nick Kyrgios måtte trekkje seg frå turneringa seint søndag kveld.

– Eg fekk nokon timar ekstra søvn, så det var fint. Eg har sett mange store kampar på denne banen før, sa Ruud.

Ruud har aldri før slått to motstandarar i hovudtablået i Wimbledon. I fjor vart det exit i 2. runde for Ugo Humbert. Ruud deltek i Grand Slam-turneringa for femte gong og er fjerdeseeda i årets utgåve.

Lokoli er nummer 199 på verdsrankinga, og tok seg gjennom tre kvalifiseringskampar for å delta på hovudtablået. Det er første gong at 28-åringen har komme seg forbi kvalifiseringa i Wimbledon. I 1. runde vart det likevel stopp mot verdsfiraren.

Kampen måndag vart litt utsett grunna regn i den engelske hovudstaden, men duoen var i gang med kampen sin litt over klokka 16 norsk tid.

Varma opp med golf

Ruud har ikkje gras som favorittunderlaget sitt og droppa å spele oppvarmingsturneringar i forkant av årets Wimbledon-utgåve. I staden har nokre av dagane vorte brukte på golfbanen.

– Eg har brukt ein del timar på golfbanen dei siste vekene. Eg har nytt det, og har hatt ei fin stund heime med familie og venner. Eg har klart å lade opp for å køyre på i andre halvdel av sesongen, sa han til NTB i forkant av turneringa.

Ruud fekk ein kjempestart på kampen då han braut dei to første servegamesa til franskmannen. Han kasta ikkje bort nokon av sine eigne servar og vann det første settet heile 6–1.

– Stakkars Lokoli. Han veit ikkje heilt kva som treffer han her, sa Discovery-kommentator Svein-Espen Lindås Olsen etter at Ruud hadde herja med franskmannen.

Poengstraff

I andre sett vakna Lokoli og tok vare på eigne servegames. Han pressa Ruud lenge, og i det siste servegamet til nordmannen vart han broten og tapte 5–7.

Ruud fekk inn eit tidleg servebrot i tredje sett, men vart brote rett tilbake. Etter kvart fekk han inn eit til servebrot og tok settsigeren med 6–4.

I starten av det fjerde settet pådrog Lokoli seg straff då han brukte for lang tid på serven. Det førte til at Ruud fekk eitt poeng. Franskmannen viste stor frustrasjon over situasjonen.

På stillinga 2–2 fekk Ruud inn eit servebrot som bana veg for siger. Nordmannen gav ikkje vekk nokon av sine eigne servegames og sikra avansement.

(©NPK)

Casper Ruud er klar for 2. runde i Wimbledon. Foto: Alastair Grant / AP / NTB

Laurent Lokoli måtte ned på graset ein tur under kampen mot Casper Ruud. Foto: Alastair Grant / AP / NTB