Ruud vidare i Wimbledon for første gong

Før utgåva av grasturneringa hadde nordmannen aldri greidd å ta seg forbi første runde i single. Med settsiffera 7–6 (7-1), 7–6 (11-9), 6–2 greidde han det. Kampen vart stoppa av regn både i det første og andre settet, men nordmannen hadde til slutt få problem med å slå spanjolen.

I det andre settet låg Ruud under med fem settballar i tiebreaket, men han kjempa seg meisterleg tilbake og tok sigeren. Kampen, som starta klokka 12, var ikkje ferdig før 17.40. Dermed vart det ein lang dag for Ruud trass at han berre trong tre sett på å sikre sigeren.

Ruud var tredjeseeda i årets Wimbledon, men hadde inga perfekt opplading til turneringa. Han rauk ut i strake sett mot Ryan Peniston, rangert 180 i verda, i den einaste grasturneringa han spelte i forkant.

Regnpause

Ruud opna kampen på positivt vis og gjekk opp i 3-2-leiing, men rett i etterkant kom regnet og stoppa kampen.

Etter over ein times pause kom kampane i gang igjen. Både Ruud og Ramos-Viñolas hadde fleire brotballar i det første settet, men klarte ikkje å bryte serven til motstandaren ein einaste gong. Dei følgde kvarandre opp til 6–6 i games før Ruud vann 7–1 i tiebreaket.

Det var ei jamspelt opning i det andre settet der dei følgde kvarandre opp til 3-3, men så kom det fleire servebrot. Likevel stod det likt etter ti games.

Heroisk opphenting

Nordmannen hadde ei gyllen moglegheit til å sikre settet då han braut nok eit servegame, men han klarte ikkje å stoppe tre spanske brotballar. I tiebreaket kjempa Ruud heroisk då han låg under med fem settballar og sikra settet med stillinga 11–9.

Tidleg i det tredje settet vart oppgjeret igjen stoppa av regnet i overkant av ein time. Då dei kom i gang igjen var Ruud god og braut spanjolen i hans andre servegame. Deretter tok han vare på sin eigen serve og gjekk opp i 4-1-leiing.

Det forspranget gav han ikkje frå seg og sikra sigeren med eit brot i det siste gamet. I andre runde møter Ruud vinnaren av kampen mellom argentinaren Tomas Martin Etcheverry og franske Ugo Humbert.

(©NPK)

Casper Ruud er klar for andre runde av Wimbledon for første gong. Foto: Alastair Grant / AP / NTB

Casper Ruud viste gode takter på graset i London måndag. Foto: Alastair Grant / AP / NTB