Salet av fjellhytter har falle 36 prosent i år

Fram til midten av desember var det omsett 36 prosent færre fjellhytter her i landet enn i same periode i fjor, ifølgje Prognosesenteret. Tala omfattar hytter som ligg 800 meter over havet eller høgare, skriv Dagens Næringsliv.

– Prisane er på veg ned. Dei to største barrierane mot å kjøpe fritidsbustad akkurat no, er høgare straumprisar og auka utlånsrenter. Det viser undersøkingane våre, seier senioranalytikar Carl Christian Mathiesen i Prognosesenteret, som har følgt hyttemarknaden tett i ei årrekkje.

Totalt for alle typar hytter er det førebels omsett 10.600 fritidsbustader. Det er 26 prosent færre enn same periode i fjor.

– Vi kjem mest sannsynleg til å passere 11.000 fritidsbustadomsetningar i år – på nivå med åra 2015 til 2019, seier Mathiesen.

(©NPK)

Hyttesalet er mykje lågare i år enn i fjor. Særleg gjeld dette hytter på fjellet. Her ei hytte på Beitostølen. Foto: Terje Pedersen / NTB / NPK