Salet av solkrem med høg faktor har skote i vêret

Salet av dei mest beskyttande solkremane har hatt ein kraftig auke frå 35 prosent i 2010 til 60 prosent per i dag, viser salsstatistikk frå Apotekarforeininga.

Salet av solkrem med lågare faktor er redusert med nesten 20 prosent sidan 2010.

Tala viser også at det generelt blir selt meir solkrem i apotek enn for seks år sidan.

– Både apoteka, Kreftforeningen og styresmaktene har prata mykje om kor viktig det er å beskytte seg i sola. Det ser ut til at bodskapen har gått heim hos solhungrige nordmenn, seier kommunikasjonssjef Jostein Soldal i Apotekarforeininga.

Soldal minner om at solkrem ikkje alltid er nok for å beskytte seg mot sterk sol. Det er viktig å ta pausar frå sola også. (©NPK)