Salman Rushdie slit etter knivangrepet i fjor
Den britiske forfattaren Salman Rushdie seier at det er veldig vanskeleg å skrive etter at han i august i fjor vart knivstukken. Tysdag gir han ut ny bok.
I forkant av utgivinga av boka «Victory City» snakkar forfattaren til magasinet The New Yorker om vanskar han opplever etter knivangrepet.
– Det er noko som heiter PTSD, veit du, seier Rushdie.
PTSD, eller posttraumatisk stressliding, blir kjenneteikna av at ein gjennomlever ei traumatisk hending på nytt og har stadige mareritt om det som skjedde.
– Veldig vanskeleg
– Eg har synst det er veldig, veldig vanskeleg å skrive. Eg set meg ned for å skrive, og ingenting skjer. Eg skriv, men det er ein kombinasjon av blankhet og søppel, ting eg skriv og som eg slettar dagen etter. Eg er ikkje ute av den skogen enno, eigentleg, seier forfattaren.
Rushdie vart i august i fjor angripe av ein 24 år gammal mann væpna med kniv som stakk han 18 gonger i halsen og overkroppen under ei forelesing om kunstnarisk fridom på Chautauqua-instituttet i delstaten New York.
Har det betre
Han fortel at mykje av skadane er lækte, men at han ikkje er i god stand til å skrive veldig bra fordi han manglar kjensler ytst på av nokre av fingertuppane.
– Eg har det betre. Med tanke på det som skjedde, så har eg det ikkje så ille, legg Rushdie til.
Forfattaren har i over 30 år levde med drapstruslar etter at Irans dåverande åndelege leiar, ayatolla Khomeini, i 1989 beordra drapet på Rushdie som følgje av «Sataniske vers». Rushdie vart tvinga til å leve under kontinuerleg politivern i ni år.
(©NPK)
Forfattar Salman Rushdie vart i august i fjor angrepet med kniv på ei scene i New York. Arkivfoto: Evan Agostini / Invision / AP / NTB